ಗ್ಯಾಸ್ ಬಿಲ್ ಅಪ್‌ಡೇಟ್ ಹೆಸರಲ್ಲಿ ವಂಚನೆ: ಉಡುಪಿಯ ದಂಪತಿಗೆ 1.45 ಲಕ್ಷ ರೂಪಾಯಿ ನಾಮ!

ಮಹಾನಗರ ಗ್ಯಾಸ್ ಬಿಲ್ ಅಪ್‌ಡೇಟ್ ಮಾಡುವ ನೆಪದಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬರು ಮಹಿಳೆಯೊಬ್ಬರಿಗೆ ಆಮಿಷವೊಡ್ಡಿ, ಅವರಿಂದ ಮೊಬೈಲ್ ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಿಸಿ ದಂಪತಿಯ ಬ್ಯಾಂಕ್ ಖಾತೆಗಳಿಂದ ಒಟ್ಟು 1,45,022/- ರೂಪಾಯಿಗಳನ್ನು ದೋಚಿರುವ ಘಟನೆ ಉಡುಪಿಯಲ್ಲಿ ನಡೆದಿದೆ.

ಪಿರ್ಯಾದಿದಾರರಾದ ಲೀಲಿ ಪ್ಲೋರಿನ್ ಡಿಸಿಲ್ವಾ ಅವರಿಗೆ ಮಾರ್ಚ್ 11, 2026 ರಂದು ಬೆಳಿಗ್ಗೆ 11:30 ಗಂಟೆಗೆ ಮುಂಬೈನ ‘ಮಹಾನಗರ ಗ್ಯಾಸ್ ಲಿಮಿಟೆಡ್’ನಿಂದ ಮಾತನಾಡುತ್ತಿರುವುದಾಗಿ ತಿಳಿಸಿ ದೇವೇಶ ಜೋಷಿ ಎಂಬ ವ್ಯಕ್ತಿ ಕರೆ ಮಾಡಿದ್ದನು. “ನೀವು ಆನ್‌ಲೈನ್‌ನಲ್ಲಿ ಪಾವತಿಸಿದ ಗ್ಯಾಸ್ ಬಿಲ್ ಅಪ್‌ಡೇಟ್ ಆಗಿಲ್ಲ” ಎಂದು ನಂಬಿಸಿದ ಆತ, ವಾಟ್ಸಾಪ್ ಮೂಲಕ ‘ಮಹಾನಗರ ಗ್ಯಾಸ್ APK APP’ ಎಂಬ ಲಿಂಕ್ ಕಳುಹಿಸಿ ಅದನ್ನು ಡೌನ್‌ಲೋಡ್ ಮಾಡುವಂತೆ ಸೂಚಿಸಿದ್ದನು.

​ಅದರಂತೆ ಲೀಲಿ ಅವರು ಆಪ್ ಡೌನ್‌ಲೋಡ್ ಮಾಡಿದ ನಂತರ, ತಾಂತ್ರಿಕ ದೋಷದ ನೆಪವೊಡ್ಡಿ ಆರೋಪಿಯು ಮಧ್ಯಾಹ್ನ 3:00 ಗಂಟೆಗೆ ಪುನಃ ಕರೆ ಮಾಡಿ ಲೀಲಿ ಅವರ ಗಂಡನ ಕೆನರಾ ಬ್ಯಾಂಕ್ (ಸಂತೆಕಟ್ಟೆ ಶಾಖೆ) ಖಾತೆ ಸಂಖ್ಯೆಯನ್ನು ಪಡೆದುಕೊಂಡಿದ್ದನು.

ಅಪರಾಹ್ನ 4:00 ಗಂಟೆಯ ಸುಮಾರಿಗೆ ಲೀಲಿ ಅವರ ಮೊಬೈಲ್‌ಗೆ ಹಣ ಕಡಿತಗೊಂಡಿರುವ ಸಂದೇಶಗಳು ಬಂದಿವೆ. ಪರಿಶೀಲಿಸಿದಾಗ:

​ಲೀಲಿ ಅವರ ICICI ಬ್ಯಾಂಕ್ ಖಾತೆಯಿಂದ ಎರಡು ಹಂತಗಳಲ್ಲಿ (46,636/- ಮತ್ತು 29,381/- ರೂ.) ಹಣ ಕಡಿತವಾಗಿತ್ತು.

​ಅವರ ಗಂಡನ ಕೆನರಾ ಬ್ಯಾಂಕ್ ಖಾತೆಯಿಂದ 69,005.31/- ರೂಪಾಯಿ ಡೀಬೆಟ್ ಆಗಿತ್ತು.

​ಒಟ್ಟಾರೆಯಾಗಿ ದಂಪತಿಯ ಖಾತೆಗಳಿಂದ 1,45,022/- ರೂಪಾಯಿಗಳನ್ನು ವಂಚಕರು ಲಪಟಾಯಿಸಿದ್ದಾರೆ.

​ತಮಗೆ ಮೋಸವಾಗಿರುವುದನ್ನು ಅರಿತ ಲೀಲಿ ಪ್ಲೋರಿನ್ ಡಿಸಿಲ್ವಾ ಅವರು ನೀಡಿದ ದೂರಿನ ಮೇರೆಗೆ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 40/2026, ಭಾರತೀಯ ನ್ಯಾಯ ಸಂಹಿತೆಯ (BNS) ಕಲಂ 318(4) ಮತ್ತು ಮಾಹಿತಿ ತಂತ್ರಜ್ಞಾನ ಕಾಯ್ದೆಯ (IT Act) 66(D) ಅಡಿಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

​ಗಮನಿಸಿ: ಅಪರಿಚಿತರು ಕಳುಹಿಸುವ ಯಾವುದೇ APK ಫೈಲ್‌ಗಳನ್ನು ಅಥವಾ ಲಿಂಕ್‌ಗಳನ್ನು ಡೌನ್‌ಲೋಡ್ ಮಾಡಬೇಡಿ. ಇದು ನಿಮ್ಮ ಮೊಬೈಲ್‌ನ ಸಂಪೂರ್ಣ ನಿಯಂತ್ರಣವನ್ನು ವಂಚಕರ ಕೈಗೆ ನೀಡಬಹುದು.